2022-ci ilin dekabr ayında qeyri-hökumət təşkilatlarını təmsil edən bir qrup Azərbaycan ekoloqları Laçın-Şuşa yolunda etiraz aksiyasına başladılar. Onlar Rusiya sülhməramlı kontingentinin müvəqqəti yerləşdirildiyi Azərbaycan ərazilərində təbii ehtiyatların qanunsuz istismarına etirazlarını bildirirdilər.
Ekoloji fəallar Azərbaycanın təbii sərvətlərin talan edilməsinə son qoyulması tələblərini bildirən şüarlar səsləndirdilər. Etirazçılar Qızılbulaq qızıl yatağına və Dəmirli mis-molibden yatağına buraxılmayınca aksiyanı davam etdirmək fikrində olduqlarını bildirdilər. Bu barədə Azərbaycan Xarici İşlər Nazirliyi Rusiya tərəfinə etiraz notası göndərdi. Notada Azərbaycan nümayəndələrinin göstərilən yataqlara maneəsiz baş çəkmələrini təmin etməyə çağırış əks olunmuşdu. Belə səfərə maneə törətməyin və ya hər hansı şərtlər irəli sürməyin yolverilməz olması vurğulanırdı.
Qeyri-hökumət təşkilatları nümayəndələrinin, ekofəalların və gənc könüllülərin Azərbaycan Respublikasının Rusiya sülhməramlı kontingentinin müvəqqəti yerləşdiyi ərazilərində təbii sərvətlərin qanunsuz istismarına etiraz əlaməti olaraq 2022-ci il dekabrın 12-dən başlanan dinc etiraz aksiyası 2023-cü il aprelin 28-ə kimi, yəni 138 gün davam etmişdir.