2021-ci ilin yanvarın 11-də Rusiya Federasiyasının rəhbərliyi vasitəçilik missiyasının davamı olaraq Prezident Vladimir Putinin təşəbbüsü ilə Moskvada Azərbaycan Prezidenti İlham Əliyev və Ermənistanın baş naziri Nikol Paşinyanın iştirakı ilə üçtərəfli görüşün keçirildi. Bu görüşün yekunu ilə bağlı tərəflər dəmir yolu, avtomobil və kombinə edilmiş daşınmalarla bağlı, təhlükəsizlik, sərhəd, gömrük, sanitariya, baytarlıq, fitosanitar və digər nəzarət növləri daxil olmaqla, nəqliyyatın təmin edilməsi məsələləri bağlı razılığa gəldilər. Lakin həmin vaxtdan xeyli keçməsinə baxmayaraq, Ermənistan hələ də üzərinə götürdüyü öhdəlikləri yerinə yetirmir. Zəngəzur dəhlizinin açılmasına müxtəlif bəhanələr gətirməklə mane olmağa çalışır. 2021-ci ilin iyunun 15-də Şuşada Azərbaycan Respublikasının Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın təkbətək görüşündən sonra “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalandı. Bu Bəyannaməyə görə Azərbycan ilə Türkiyə özlərinin strateji müttəfiqliklərini bir daha mühüm bir sənədlə təsdiqləmiş oldular.
2022-ci ilin noyabrın 16-da Azərbaycan Prezidenti İlham Əliyevin sərəncamı ilə "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" təsdiq edildi. Bununla da Azərbaycan Respublikası özünün azad olunmuş torpaqlarında irimiqyaslı bərpa-quruculuq layihələri ilə səciyyələnən, dayanıqlı sülhə, tərəqqiyə əsaslanan və bir çox ölkələr üçün nümunə olan tarixin yeni mərhələsinə qədəm qoydu.