2023-cü il aprelin 23-də Azərbaycan Dövlət Sərhəd Xidmətinin bölmələri tərəfindən suveren ərazimizdə, Ermənistanla sərhəddə, Laçın-Xankəndi yolunun başlanğıcında nəzarət-buraxılış məntəqəsinin qurulması hər bir Azərbaycan vətəndaşını qürurlandırdı və sevindirdi. Çünki sərhəd-nəzarət mexanizminin yaradılması yolda hərəkət üzrə şəffaflığı, qanunun aliliyini və hərəkətin təhlükəsizliyini təmin etməklə, istənilən təxribatın qarşısının alınmasına yönəlmişdi. Azərbaycan ərazilərində qanunsuzluğun qarşısının alınmasına yönəlmiş bu qətiyyətli addım həm də 138 gün davam edən ekoloji aksiyaların hədəflərinə qismən çatması demək idi. “Laçın” dövlət sərhədində buraxılış məntəqəsinin qurulması Azərbaycan Respublikası dövlət sərhədlərinin tam bərpası tarixi kimi Zəfər tariximizə yazıldı.
Laçın-Xankəndi yolunun başlanğıcında dövlət sərhədində buraxılış məntəqəsinin qurulması, fəxarət rəmzimiz olan dövlət bayrağının qaldırılması barədə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə məruzə edilməsi tariximizdə böyük qürur hissi ilə vurğulanacaqdır.
Azərbaycan Prezidenti, Müzəffər Ali Baş Komandan İlham Əliyev “Laçın-Xankəndi yolunun başlanğıcında dövlət sərhədində buraxılış məntəqəsinin qurulması ölkəmizin suveren hüququnun və ərazi bütövlüyünün təmin olunmasının ifadəsidir” deməklə, bu tarixi hadisəyə yüksək qiymət vermişdir.