Azərbaycanın hərbi-siyasi qələbəsinin və Ermənistanın kapitulyasiyasının təsdiqi olan Azərbaycan, Rusiya prezidentlərinin və Ermənistanın baş nazirinin imzaladıqları 2020-ci il 10 noyabr Bəyanatının müddəalarına uyğun olaraq Ağdam (20 noyabr 2020-ci il), Kəlbəcər (25 noyabr 2020-ci il) və Laçın (1 dekabr 2020-ci il) rayonları döyüşsüz Azərbaycana təhvil verildi.
Razılaşma əsasında Ağdam, Kəlbəcər və Laçın rayonları, Azərbaycan Prezidentinin öz müraciət və bəyanatlarında dəfələrlə təkrar etdiyi kimi əvvəlcədən müəyyən olunmuş dəqiq qrafik cədvəli əsasında, özü də bir güllə belə atmadan işğaldan azad olundu. Bununla işğal altında olan 7 rayonumuzun hamısı işğaldan azad edildi. Bu tarixi qələbənin icraçısı rəşadətli Azərbaycan Ordusu, onun baş memarı və təminatçısı isə Müzəffər Ali Baş Komandan İlham Əliyev oldu.
2020-ci ilin dekabrın 10-da Bakı şəhərinin Azadlıq meydanında Qələbə Paradı - Zəfər Paradı keçirildi. Hərbi qənimət kimi döyüş meydanında ələ keçirilmiş düşmən texnikasının bir hissəsi orada nümayiş etdirildi. Türkiyə Respublikasının Prezidenti Rəcəb Tayyib Ərdoğanla bərabər tədbirdə yerli və xarici rəsmi qonaqlar, diplomatik korpusların nümayəndələri də iştirak edirdilər. Vətən müharibəsində Qələbəyə həsr olunmuş Zəfər Paradında Prezident, Müzəffər Ali Baş Komandan İlham Əliyev xalqımızın haqq-ədalət uğrunda mübarizəsini belə ifadə edib: “Azərbaycan 44 gün ərzində parlaq qələbə qazanaraq Ermənistanı məğlub etdi, işğala son qoydu. Bu 44 günün hər günü bizim şanlı tariximizdir”.