2020-ci il sentyabrın 27-də Ermənistanın növbəti hərbi təxribatına cavab olaraq Azərbaycan Ordusu əks-həmlə əməliyyatına başlamış və 44 gün davam edən Vətən müharibəsi nəticəsində torpaqlarımız işğaldan azad olunmuş, ölkəmizin ərazi bütövlüyü bərpa edilmişdir.
44 günlük Vətən müharibəsində xalqımız 30 ilə yaxın işğal altında olan torpaqlarımızı azad edərək müstəqillik tariximizə qızıl hərflərlə yazılan, onu şərəfləndirən möhtəşəm Qələbəyə imza atdı. Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğalçı Ermənistanı döyüş meydanında darmadağın edərək torpaqlarımızın işğalına son qoydu. Ona görə də 2020-ci il Azərbaycanın tarixinə Qələbə ili kimi yazıldı. Azərbaycanın ərazi bütövlüyünün bərpa olunması ilə başa çatan İkinci Qarabağ müharibəsi müstəqillik və dövlətçilik tariximizin olduqca mühüm səhifələrindən biridir.
44 günlük müharibədə Azərbaycan həm də informasiya cəbhəsində mübarizə apardı və qalib çıxdı. Həmin günlərdə respublikamız düşmənin saxta informasiya cəbhəsini darmadağın etdi. Azərbaycan Prezidenti, Müzəffər Ali Baş Komandanımız İlham Əliyev sentyabrın 29-dan noyabrın 9-na kimi 26 xarici KİV-ə müsahibə verdi. Özünün “Twitter” səhifəsindən 29 paylaşım etdi və 8 dəfə xalqa müraciət ünvanladı. Bununla da Prezident İlham Əliyev erməni təbliğatına, hətta düşmənin maraqlarını müdafiə edən informasiya məkanlarında tutarlı zərbə vurdu. Ermənistanın erməni lobbisi və xaricdəki havadarlarına əsaslanaraq yenidən özü üçün münbit informasiya mühiti yaratmaq cəhdləri iflasa uğradı.